Ki 100 tylli ki khubor ka koit ka khiah nakabynta ki khynnah ba kin tip bad ban ia sam ki dei ki ba suk bad ki ba lah ban shaniah kiba la thmu kyrpang nakabynta ki khynnah kiba ha ka rta kaba 6 haduh 14 snem. Ngi sngew ba ka long kaba donkam ba ki samla lud kiba don ha ka rta kaba 10 haduh 14 snem kin tip shaphang kane ka khubor ka koit ka khiah namar dei ha kine ki rta ba ki khynnah ki shim ia ka bynta ban long ki nongri nongsumar ia ki para kiba dang rit ha ki iing ki sem jong ki. Bad ka long ruh kaba donkam ban ithuh bad ban ai ka jingiaroh ia ki na ka bynta kane ka kam ban iarap ia ka iing ka sem ha kane ka rukom.

Ki 100 tylli ki khubor ka koit ka khiah ki kynthup ia ki 10 tylli ki khubor ha ki 10 tylli ki phang ba kongsan jong ka koit ka khiah. Kita ki long: ka Malaria (ka jingpang khieshohrih), ka Diarrhoea (ka prie pynhiar), Nutrition (ka jingioh ia ki jingbam tei met), Coughs colds & illness (ka jingpang jyrhoh, baiongkhlieh), intestinal worms (ka jingdon wieh ha ki snier), Water & Sanitation (ka umbam umdih bad ka jingleh khuid leh suba), immunization (ka jingai dawai tika ban iada na ki jingpang), ka HIV/AIDS bad ki jing aksiden, jingmynsaw, ka jingheh jingsan ha ka por khyllung. Kine ki khubor kiba suk ban sngewthuh ki long nakabynta ki kmie ki kpa bad ki nonghikai shaphang ka koit ka khiah ban pyndonkam bad ki khynnah, la ha iing ne ha skul ne ha kino kino ki seng bad ha ki jaka ai jingsumar.

Kine ki long kita ki 10 tylli ki khubor ka koit ka khiah halor ka phang kaba 1: KA JINGSUMAR IA KI KHYLLUNG

  1. Ialehkai, kdup ieit, kren, bad ia rkhie bad ia rwai bad ki khyllung bad ki khynnah rit ruh kumjuh katba phi lah.
  2. Ki khyllung bad ki khynnah rit ki long kiba kloi ban khie dom, ban sngew sheptieng bad ban khnii iam, bad kim lah ban iathuh ne batai ia ki jingsngew jong ki. Kumta ngi dei ban long kiba jynsur mynsiem bad ki barabor.
  3. Ki khyllung/khynnah rit ki nangkloi: kumno ban iaid, ban pyrthuh ia ki sur, ban bam bad ban dih. Iarap ia ki ha ka ban leh ia kine ki kam, hynrei ha kajuh ka por ailad ia ki ba kin pyrshang hi ia kiei kiei wat la ki bakla, tangba peit ba kin nym mynsaw pat.
  4. Baroh ki khyllung, la shynrang ne kynthei, ki long kiba kordor: sumar bha ia ki, khamtam ia kito kiba pang bad kiba don jingduna ha ki dkhot met jong ki.
  5. Ki khyllung/khynnah ki pyrthuh ia ka jinglong jong kiba la heh la san kiba ki iohi barabor. Bishar bha ia ki kam kiba phi leh hakhmat jong ki bad pyni ia ka lynti kaba dei ia ki.
  6. Ha ba ki khyllung/khynnah ki iam, ka don ka daw (lah ban long ba ki thngan, ki tieng ne ki pang). Pyrshang ban wad iaka daw tynrai balei ki iam.
  7. Iarap ban pynkhreh ia ki khyllung/khynnah nakabynta ban pule ha skul lyngba ki jingialehkai da ki nombor, ki dak thoh, ki jingdro dur bad airong. Iathuhkhana, ia rwai bad iashad bad ki.
  8. Ha ka kynhun, peit bad buh jingthoh kumno i khyllung i heh i san na kaba kyrsih sha ka par, bad haba i iaid nyngkong ne kren nyngkong.
  9. Ia rap ban iada ia ki khyllung/khynnah na ki jingpang da kaba hikai ia ki nongri khyllung bad ia ki khynnah ba la kham heh ba kin peit bad khmih ia ka jingkhuid jingsuba ki khyllung (khamtam ia ki kti bad ka dur khmat), ba ki dih ka um kaba khuid bad ba ki bam ki jingbam ki ba tei.
  10. Sumar da ka jingieit ia ki khyllung/khynnah, tangba wat klet ban sumar ialade ruh. Ka jingsumar ialade ka long kaba donkam.

Kine ki khubor ka koit ka khiah ki dei ki ba la bishar bad pynjanai da ki riew shemphang ka koit ka khiah bad phi lah ban shem ia ki ha ka ORB health website.

Kine harum ki long khyndiat ki jingai jingmut shaphang kiei kiba ki khynnah ki lah ban leh khnang ba kin snghewthuh khambha ia ka phang bad ba kin ia sam iaka khubor bad kiwei.

KA JINGSUMAR IA KI KHYLLUNG: Kaei Kaba Ki Khynnah Ki Lah Ban Leh?

  • SHNA hi ia ki khubor halor ka phang Ka Jingsumar ia ki Khyllung da ki kyntien lajong ha ka ktien jongphi hi
  • PULE LYNDET ia ki khubor jingtip khnang ban ym klet ia ki lano lano ruh
  • IA SAM ia ki khubor jingtip bad kiwei ki khynnnah bad ruh ha ki iing ki sem jong ngi
  • PHIAH ia ki khynnah kynthei bad shynrang la ka jong.Phah ia ki khynnah shynrang ba kin leh ia ki jinglehkai kynthei bad ia ki kynthei kin leh ia ki jinglehkai shynrang. Hadien sa ailad ia baroh ar ki kynhun ba kin ia phylliew jingmut halor kita ki jingialehkai. Kum ka nuksa, kylli hato phi sngew iahap ban pyniapher ia ki jinglehkai shynrang na ki jinglehkai kynthei. Lada em ne hooid, balei?
  • PHYLLIEW JINGMUT bad ia tai halor kiei ki ‘Jinglong ba bha’ bad ‘Jinglong ba sniew’ ha iing ne ha skul, bad batai bniah balei la khot ia ki kumta.
  • SHNA ia ki dur poster ban pyni sha kiwei ia kaei kaba phi sngewthuh halor kane ka phang.
  • PYNLONG ia ka jingiakop shna khun-jingialeh-kai kum ki mobile, ki shakuriaw, ki jingtei, ki khun mynriew, ki kot tah dur – ha iing, ha skul ne ha ki dong ha shnong.
  • SHNA ia ki jingdro bad ki dur poster ban pyni ia ki lad jingiada na ki jingpang da kaba sait ia ki kti da ka sabon, da kaba leit ai dawai tika, ne da kaba bam ia ki jingbam ba tei ia ka met ka phad.
  • SHNA ia ki drama lyngkot halor kumno ki nongri/nongsumar khun ki ialehkai bad ki khynnah rit. Ki lah ban ak drama halor ka jingiakren hapdeng arngut ki longkmie: iwei iba ngeit ba ki khynnah ki dei ban long ki ba jarjar bad iwei pat iba ngeit ba ki khynnah ki dei ban long ki ba lehkmen leh sngewbha. Pyni ia ki jingsngew tang da kaba shu ak khlem da kren eiei. Kiwei ki khynnah kin batai ia ka jingmut jong kata ka jingleh, tang da kaba ki shu peit.
  • KYLLI ia ki kmie ki kpa bad ki kmie ieit kpa ieit balei ki khyllung ki iam lane ki rkhie. Sa ia sam lem ha klas ia kaei ba ki pynsngew.
  • Ka klas ne ka kynhun ka lah ban SHIMTI BAN BUDDIEN IA KA JINGHEH JINGSAN JONG IWEI I KHYLLUNG na dong ne shnong. Ka kmie kan wan kynduh ia ka kynhun man u bnai ban ioh ia sam bad ban iathuh kumno i khyllung i la nang heh nangsan katba nang iaid ka por.
  • SHNA ia ki jingrwai ki ban iathuh shaphang ki kam kiba suk ba ki lah ban leh ban iada na ki khniang jingpang, kum ka ba pyndonkam ia ka umbam umdih kaba khuid, bad rwai ia kita ki jingrwai bad ki para ha iing.
  • Ai ba ki khynnah kiba la kham heh kin kylli ia ki kmie ki kpa kiei ki jingeh kiba ki ia kynduh ha kaba ri ba sumar ia ki khun haba ki dang khyllung, bad kiei ne kino ki jingleh kiba la iarap eh ia ki.
  • KYLLI ia ki nongtrei ka koit ka khiah ne ki nonghikai saian ban iathuh shuh shuh ia phi kumno ka jabieng jong i khyllung nangsan bad ka por.
  • KI KHYNNAH KIBA LA KHAM HEH ki lah ban phah hikai ha ki heh ki san ia ki jingrwai bad ki jingialehkai bad ban rwai ia ki jingrwai nakabynta ki hep kiba rit bad ki khyllung.
  • KI KHYNNAH ki lah ban kylli na ki rangbah ia ka kaei kaba ki sngew ba ka long kaba donkam ban leh ban iada ia ki khyllung na ki jingpang.

Nakabynta ki jingtip ba kham bniah, sngewbha wad ha ka www.childrenforhealth.org lane clare@childrenforhealth.org.

খাশি Home