8. Ka jingdon wieh ha ki snier (Khasi, Intestinal Worms)

Ki 100 tylli ki khubor ka koit ka khiah nakabynta ki khynnah ba kin tip bad ban ia sam ki dei ki ba suk bad ki ba lah ban shaniah kiba la thmu kyrpang nakabynta ki khynnah kiba ha ka rta kaba 6 haduh 14 snem. Ngi sngew ba ka long kaba donkam ba ki samla lud kiba don ha ka rta kaba 10 haduh 14 snem kin tip shaphang kane ka khubor ka koit ka khiah namar dei ha kine ki rta ba ki khynnah ki shim ia ka bynta ban long ki nongri nongsumar ia ki para kiba dang rit ha ki iing ki sem jong ki. Bad ka long ruh kaba donkam ban ithuh bad ban ai ka jingiaroh ia ki na ka bynta kane ka kam ban iarap ia ka iing ka sem ha kane ka rukom.

Ki 100 tylli ki khubor ka koit ka khiah ki kynthup ia ki 10 tylli ki khubor ha ki 10 tylli ki phang ba kongsan jong ka koit ka khiah. Kita ki long: ka Malaria (ka jingpang khieshohrih), ka Diarrhoea (ka prie pynhiar), Nutrition (ka jingioh ia ki jingbam tei met), Coughs colds & illness (ka jingpang jyrhoh, baiongkhlieh), intestinal worms (ka jingdon wieh ha ki snier), Water & Sanitation (ka umbam umdih bad ka jingleh khuid leh suba), immunization (ka jingai dawai tika ban iada na ki jingpang), ka HIV/AIDS bad ki jing aksiden, jingmynsaw, ka jingheh jingsan ha ka por khyllung. Kine ki khubor kiba suk ban sngewthuh ki long nakabynta ki kmie ki kpa bad ki nonghikai shaphang ka koit ka khiah ban pyndonkam bad ki khynnah, la ha iing ne ha skul ne ha kino kino ki seng bad ha ki jaka ai jingsumar.

Kine ki long ki 10 tylli ki khubor ka koit ka khiah halor ka phang kaba 8: KA JINGDON WIEH HA KI SNIER

  1. Da ki phew lak ki khynnah ki don wieh hapoh ki snier, bad dei na ki snier ba ka met jong ngi ka kjit ia ki jingbam.
  2. Ki jait pa ki jait wieh ki lah ban im hapoh ka met jongngi, kum ki Roundworm, Whipworm, Hookworm bad Bliharzia (Schistomiasis). Don shuh shuh nalor kita ruh.
  3. Kine ki wieh ki lah ban pynsngew shitom bad sngewtlot ia ngi. Ki lah ban pynsuhkpoh, pynjyrhoh, pynsuhkhriat bad pynioh ia kiwei de ki jingpang.
  4. Ki wieh ki don hapoh ki met jongngi bad teng teng ngim lah ban tip ba ki don hangta, hynrei teng teng phi lah ban iohi ia ki wieh ha ki jingkhyndew jongphi.
  5. Ki wieh bad ki pylleng wieh ki lah ban rung sha ki met jongngi ha kiba bun rukom. Katto katne ki ioh rung lyngba ki jingbam lane jingdih, kum ka um ka bym khuid bad pat shet bha. Kiwei pat ki ioh rung lyngba ki kjat haba ngi iaid da ki kjat suda khlem phong juti.
  6. Ban pyniap ia ki wieh da ki dawai wieh ka long kaba suk bad kine ki dawai ki long ruh kiba tad. La sam ia ki dawai wieh da ki nongtrei jong ka koit ka khiah man la ka hynriew lane khatar bnai, lane kham bunsien nakabynta kiwei ki jait wieh.
  7. Ki pylleng jong ki wieh ki shong hapoh ki um pynjhieh bad ki jingleit khyndew jongngi. Pyndonkam ia ki painkhana haba leit pynjhieh bad leit bar. Bad ynda phi la wan na ki painkhana phi dei ban da sait bha ia la ki kti da ka sabon bad ka um bad leh kumjuh hadien ba phi iarap ia para ba dang rit hadien ba ki dep leit painkhana, khnang ba ki pylleng wieh kin ym lah ban bit ha ki kti jongphi.
  8. Phi lah ban khang bad ym ailad ia ki wieh ban rung shapoh ka met jongphi da kaba phi sait bha ia ki kti da ka sabon bad ka um hadien ba phi leit pynjhieh ne leit bar bad shuwa ba phin shet jingshet, bam ne dih, bad da kaba sait bha ia ki jhur bad ki soh shuwa ban shet lane ban bam, bad da kaba phong juti lane slipar.
  9. Don kato katne ki wieh kiba shong ha ka khyndew. Kumta barabor ngi dei ban sait sabon ia ki kti man ba ngi dei ktah ia ka.
  10. Man ba ngi sait ia ki jhur ne soh shuwa ba ngin bam, ngi dei ban pyndonkam da ka um kaba khuid.

Kine ki khubor ka koit ka khiah ki dei ki ba la bishar bad pynjanai da ki riew shemphang ka koit ka khiah bad phi lah ban shem ia ki ha ka ORB health website.

Kine harum ki long khyndiat ki jingai jingmut shaphang kiei kiba ki khynnah ki lah ban leh khnang ba kin snghewthuh khambha ia ka phang bad ba kin ia sam iaka khubor bad kiwei.

KA JINGDON WIEH HA KI SNIER: Kaei Kaba ki Khynnah ki Lah Ban Leh?

  • THOH ia la ki jong ki khubor shaphang ka jingdon wieh ha ki snier da kaba pyndonkam da la ki jong ki kyntien ha ka ktien jong phi hi.
  • PULE LYNDET ia kine ki khubor khnang ba ngin nym klet ia ki.
  • IA SAM ia kine ki khubor sha kiwei ki khynnah bad sha ki bahaiing hasem jongngi.
  • PYNDONKAM da ka jing jied da ka kjat ne ‘ Vote with your feet’ ban ialeh jingkyntip ban tip haduh katno ngi la sngewthuh shaphang ki wieh.
  • SNGAP ia ki khana shaphang ki wieh khnang ba ngin lah ban sngewthuh kumno ban khang ia kine ki wieh ban saphriang da kaba ngi sait ia ki kti bad kynmaw ban phong ia ki juti.
  • WAD BNIAH kumno la pynkhreh ia ki jingbam ha ki skul jongngi bad kumno ba ki nongshet ki buh bha ia ki jingbam ba kin lait na ki wieh.
  • BARABOR pyndonkam ia ka painkhana haba ngi leit shabar khnang ba ki pylleng wieh kin ym lah ban ioh rung sha ka khyndew bad ka um.
  • BAN SAIT KHUID bha ia la ki kti ngi donkam ia ka sabon, ka um, bad ki jain kiba khuid.
  • WAD BNIAH ban tip ia ka ei ba ki dkhot ka iing jongphi ki tip shaphang ki wieh.
  • SHNA drama halor ki Wieh Basniew (wicked worm) bad kumno ba ki khynnah ki khanglad ia ki Wieh Basniew ban tuh iaka bam na ki iing jongki.
  • SHNA ia ki dur poster ban pyni kumno ban buh ia ki bam jong ngi ki ban lait na u wieh, da ka ba sait bha ia ki jhur im shwa ban bam ia ki bad shet bha iaka doh.
  • WAD JINGTIP kumno ban shna ia ki kor thet kti ne Tippy tap bad ban shna iaka jaka sait kti na bynta kaiing, ki para klas, bad ki kynhun jongphi.
  • THAW jingrwai halor kumno ban khanglad ia ka jingsaphriang ki wieh ne halor ka rukom sait kti ka ban pynkynmaw ia ngi lano bad kumno ngin sait khuid ia ki kti.
  • SHNA ia ki dur poster ka ban pynkynmaw ia ngi ban sait ia ki jhur bad ia ki soh shwa ba ngin bam ne shwa ba ngin shet ia ki.
  • LEH drama ne pyni drama da ki khun mynriew kumno ban khanglad iaka jingsaphriang ki wieh.
  • Shna ne pynlong da ka jingialehkai ban pyndap ha ki jaka ba suda (fill in the blanks) ban sngewthuh haduh katno ngi tip shaphang ki wieh. Pynlong ne ialeh ia ka jingkyntip ban sngewthuh la ngi tip ban sait ia ki kti Shuwa ban leh ia kiei kiei bad lano ngin sait ia ki kti Hadien ba la dep leh eiei. Pyndonkam ia ki jingkylli ba la ai harum.
  • BUH JINGKYLLI kumno ka met jongngi ka pyndonkam ia ki jingbam ba ngi bam man ka sngi? Katno ki jrong ki snier heh jongngi? Kumno ki wieh ki bam ia ka jingbam jongngi? Haduh katno ka uniangstar u lah ban jrong? Katno jait ki wieh phi tip ne ithuh? Ki ei ki jait wieh ki kham kynrei ha ki jaka ba phi sah? Ki ei ki dak ki shin ban ngin tip ba ngi don wieh ha ka met jongngi? Naei ba ngin ioh ia ki dawai wieh bad mano ba dei ban dih ia ki? Katno tylli ki pylleng ki wieh ki kha roi man ka sngi? Ki wieh ki lah ban shim noh ia kiwei ki jingbam na ka met jongngi kum ki Vitamin A – hato phi lah ban tip nakabynta ka ei ba ngi donkam ia ka Vitamin A? Ia ki khun wieh la khot ki Larvae (ki kynja nianglong) Kum kino ki nianglong ki lah ban rung sha ka met ka jongngi lyngba ka sniehdoh jongngi? Kumno ka jingpyndonkam ia ki painkhana ka lah ban khanglad ia ka jingsaphriang jong ki wieh? Hato ki skul jongngi ki ju don ki sngi ba ki shait sam dawai wieh? Ha kino ki sngi? Balei baroh ki ioh dawai wieh ha kajuh ka sngi? Katno ngut na ki khynnahha ka pyrthei ki don wieh? Balei ka long kaba donkam ba ngin khanglad ia ka jingsaphriang ki wieh? Shaphang ka kor tylliat bam jong ka met u briew (ka Digestive System) – Kumno ka treikam bad kumno ka jingdon ki wieh ka pynthut ia ka jingtreikam jong ka? Ki pylleng wieh ki rit haduh katno? Ka ei ka tiar kaba rit tam ba phi tip? Kumno ngi lah ban tip ba ka um ka long kaba khuid lane jaboh? Ka ei ba ki jingthung ki donkam ba kin heh kin san? Kumno ban ngin shna ia ka sboh kaba bha ban ai ia ki jingthung.

Nakabynta ki jingtip ba kham bniah kumno ban shana ia ka Tippy Tap (Kor thet kti) ne ka Hand washing Station (jaka sait kti) ne ka jingialehkai pyndap ha ki jaka ba suda (Fill in the Blanks Word Game), ne kino kino ki jingtip, sngewbha wad ha ka www.childrenforhealth.org lane ka clare@childrenforhealth.org.

Previous Home Next